Amasyalıdır. Dervîş Ahmed bin Şükrullâh oğludur. Sarrâcân-ı hâssadan olup 1058 recebinde cülûs vak’asında sipâhîlikle İstanbul’dan ihrâc edilip Amasya’ya gönderildi. 1061’de Kethüdâyeri, 1065’de Rûm defterdârı oldu.
Ancak sadr-ı esbak İbşir Paşa’ya müntesib olduğundan sene-i mezbûre recebinde sadr-ı müşârün-ileyhin azl ü katlinde ma’zûl olup Amasya’ya geldi. Bir müddet menkûbâne ikâmet ederek Köprülü Mehmed Paşa ile mu’ârefe-i sâbıkası olduğundan müşârün-ileyhin sadâretinde İstanbul’a gitdi.
1068’de Bursa mukâta’ası emîni olup Abaza Hasan Paşa’nın kıyâmında Köprülü Mehmed Paşa’nın hayli işine yaradı. Ba’dehû Arpa emîni, 1075’de Galata voyvodası olup 1078’de Fâzıl Ahmed Paşa’yı gücendirdiğinden ma’zûlen Amasya’ya i’zâm edildi. Ba’dehû tekâ’üd vazîfesiyle dem-güzâr olup 1086’da fevt oldu.
Dergâh-ı âlî kapıcıbaşılarından iş-güzâr bir kimse idi. Oğulları el-Hâc İsmâ’îl, Ahmed Ağalar olup bunlara ve evlâdına “Sarrâczâdeler” dendi. Hacı Ahmed Ağazâde el-Hâc Hâfız Mehmed Ağa 1147’de İbâdullah Câmi-i şerîfini müceddeden binâ ve emlâkini bu câmi-i şerîfin mesâlihine vakf u ihyâ etdi.