Amasya’nın Eski Kethüdâ Mahallesi eşrâfından es-Seyyid el-Hâc Abdullah Efendi bin el-Hâc Servahdî Mustafa Efendi’nin mahdûmu ve Fazlızâde es-Seyyid el-Hâc Abdülkâdir Efendi’nin kerîmezâdesi olduğu münâsebetle “Fazlızâde” demekle meşhûrdur.
Biraz tahsîl-i ma’âriften sonra Eski Kethüdâ Mahallesi’nde kâ’in mescid-i şerîf pederi tarafından minber vaz’ıyla câmiye tahvîl edildikte 1229’da bu câmi-i şerîfin hatîbi ve ba’dehû meclîs-i hâcıyân u a’yânın ve ahîren teşkîl edilen meclis-i idâre ve de’âvâ a’zâsı olduğu hâlde 1271’de vefât etdi.
Oldukça hânedân, hoş-sohbet, menâfi’-i âmmeyi düşünür bir kimse idi. Mahdûmu es-Seyyid Abdullah Efendi 1294’de vefât etdi. Bunun mahdûmu es-Seyyid Ahmed Efendi’dir. Bunun mahdûmu Hâfız es-Seyyid Mehmed Rüşdü Bey olup [222] eşrâftan Kahvecizâde Mehmed Efendi’ye dâmâd olmuş dirâyetli ve çalışkan bir gençtir.