Amasyalıdır. Amasya vâlisi Yörgüç Paşa’nın eski kethüdâsı Mehmed Ağa’nın mahdûmudur. Amasya fuzalâsından ahz-ı ulûm edib ders-i âm ve müderris-i be-nâm oldu. Ba’dehû silk-i kudâta girip bilâd ve eyâlâta kadı olup 878 hudûdunda vefât etdi. Meşâhîr-i ulemâ ve kudâtdan bir zât-ı sütûde-simât idi. Eski Kethüdâ Mahallesi’nde pederinin mescidini i’mâr ve önünde bir çeşme ihyâ ederek ba’zı emlâkını vakfetmişdi. 1332 harîkinde kâmilen yanıp arsası yola kalb edilmişdir.