Amasyalıdır. Esbak Amasya mütesellimi Hacı Efendizâde Sarı Mehmed Ağa’nın birinci oğludur. Gençliğinde sâdr-ı esbak Bayram [214] Paşa’nın himmetiyle Enderûn sarayına alınmışdı. Orada terbiye ve ta’lîm görüp seferlihânesine girdi. Bu esnâda 1058’de Köprülü Mehmed Paşa’nın gadriyle pederi maktûl olduğundan sipâhi vazîfesiyle taşra çıkarıldı.
Sekiz yıl kadar Amasya’da kalıp bir kaç defa kethüdâyeri oldu. 1066 zilka’desinde Köprülü Mehmed Paşa sadârete gelince pederinin hakkında yaptığı gadre mükâfât ve 1069’da Abaza Hasan Paşalıları tenkîle hizmet etmesiyle bu mükâfâta liyâkat göstermiş olduğundan ikinci defa Enderûn sarayına girdi.
1073’de Seferli kethüdâsı, 1077’de rikâb-ı hümâyûnda Dülbend Ağası ve kâtib-i esrâr-ı pâdişâhî olarak parlamışdı. Ancak bu parlayış Köprülüzâde Fâzıl Ahmed Paşa’nın nazar-ı dikkatini celb eylediğinden 1080 senesi rebîülevvelinde mîr-âlem olarak makâmından ayrıldı. 1081’de vefât etdi.
Yazısı güzel, pek mizâcgîr, Avcı Sultân Mehmed’in teveccühüne mazhar olmuş, sahî, müdebbir bir zât idi. Amasya’da [215] Mustafa Bey Hamamı civârında bir Dârülkurrâ yaptırdığı bunun mesâlihine Yakut Paşa mescidi önündeki büyük değirmen ve mezkûr mescid hizâsında on bâb dükkânlarını 1077 senesinde vakfetdi. Mahdûmu ulemâdan el-Hâc Ömer Efendi’dir.