Amasyalıdır. Fağfûr Paşa evlâdından Kâtibzâde Mehmed Efendi bin Hasan Efendi’nin mahdûmudur. Meşâhîr-i fuzalâdan Yağmurköylü el-Hâc İsmâ’îl Efendi’den vesâ’ir ulemâ-yı asrından ahz-ı ulûm edib ders-i âm ve medâris-i adîdeye müderris oldu.
1043 senesi muharreminde Atabeg müderrisliğinden kassâm-ı askerî ve cumâdel [401] ûlâ gurresinde Amasya kâdısı oldu. Ba’dehû mükerreren azl ü nasb edildi. Ba’dehû Sivas, Canik gibi bilâd-ı mühimmeye kâdı olup 1054 muharreminde Amasya kazâsından ma’zûlen vefât etdi.
Âlim, ta’lîk-nüvîs, fakîh olup kazasker Amasyalı Hasan Efendi’nin akrabâsından ve mevâlî-i devriyyeden idi. Amasya’da menzil-hâne civârında bir çeşmesi vardır. Oraya “Kâdı Çeşmesi” dendi. Mahdûmları Mustafa, Abdulbâkî Efendilerdir.
Mustafa Efendi, Rûmeli kudâtından idi. Abdulbâkî Efendi de Anadolu kudâtından olup mahdûmları es-Seyyid Mehmed, Hasan Efendilerdir. es-Seyyid Mehmed Efendizâde es-Seyyid İbrâhim Çelebi 1147’de ceddinin çeşmesini i’mâr etmişdir. Bunlara “Kâdızâdeler” dendi.