Amasyalıdır. Alî bin Hamza mahdûmu olup sipâhî kayd edildi. Sipâhî meşâhîrinden olup vüzerâdan Güzelce Mahmûd Paşa’nın tâbi’i, ba’dehû kethüdâsı olduğu münâsebetle kendisine “Mahmûd Paşalu” dendi.
Mahmûd Paşa’nın vefâtından sonra Canik sancâğı muhassıl-ı emvâli, ba’dehû kethüdâyeri ve mütesellimi olduğu esnâda Abaza Mehmed Paşa’nın hücûmuna karşı fevka’l-âde müdâfa’a edib Abaza’yı Samsun’a yanaşdırmadı. Bundan dolayı takdîr edilip 1032 senesi zilka’desinde Canik mîrlivâsı oldu.
1033 ’te Ruslar, karşı yakadan on altı şayka ile gelip, Samsun’a hücûm etdiği esnâda seksen kişiden ibâret olan ma’iyyetiyle Ruslar’a hücûm ederek onbir pâre şaykalarını ahz ve beşini de firâra mecbûr edib hayli esîr [397] ve ganâyim aldı.
Rusların toplarla harâb etdiği Samsun şehrini ve kal’asını i’mâr edib parlak hizmetler ve yararlıklar ibrâz etdiği münâsebetle takdîrât-ı pâdişâhîye nâ’il olup sene-i mezbûre zilka’desinin yirmisinde ma’iyyetine beşer akçe terâkkî ihsân buyruldu.²⁵²
Beş yıl kadar Samsun’da hüsn-i idâresi sâyesinde kalıp 1037 zilka’desinde ma’zûlen Amasya’ya gelip Sultân Bâyezîd evkâfı mütevellîsi olarak bir müddet istirâhat etdi. 1039 senesi saferinde terfî’an Kefe Beylerbeyi olup gitdi.
1041 senesi cumâdelûlâsında ma’zûlen Amasya’ya gelip sânîyen evkâf-ı Sultânîye mütevellîsi oldu. 1043 senesi şevvâlinde Trabzon Beylerbeyi olup gitdi. Ba’dehû Adana, Konya eyâletlerine sırasıyla Beylerbeyi olup 1048’de vefât etdi. Şecî’, mukdim, sâdık bir zât idi.