Merzifonludur. Hacı Bayramzâde Ali Efendi’nin mahdûmudur. Orada mukaddimât-ı ulûmu görüp Amasya’ya geldi. Meşâhîr-i fuzalâdan Şirvânî el-Hâc Mustafa Efendi’nin halka-i tedrîsine mülâzemet ederek ikmâl-i tahsîl ve ahz-ı icâzet ederek Merzifon’a avdet etdi.
Orada yıllarca talebeye tedrîs-i ulûm ve halka va’z ü nasîhat ederek Hacı Hamza Nigârî Efendi’nin müdde’iyâtına şiddetle mukâbele edib halkı îkâz etmeğe çalışdı. Ehl-i sünnet mesleğini fevka’l-âde müdâfa’a ederek tefrîkayı kaldırmağa himmet etdi. İki def’a haccedip ikincisinde [277] 1308 senesi zilhiccesinde Mekke-i Mükerreme’de dâr-ı na’îme rihlet etdi. Meşâhîr-i ulemâdan sâlih, gâyet dîndâr idi.