Amasyalıdır. Mahallesi ve câmii olan Hacı Hamza Bey bin Ahmed Bey’in ahfâdından Kâsım Ağa bin Mehmed Çelebi mahdûmudur. Sipâhî olup muhârebâtta şecâ’ati ve yararlığı görüldüğünden “Uzun Sipâhî” demekle iştihâr etdi.
Mükerreren Amasya kethüdâyeri, Sivas vilâyeti cizye-dârı, Tokat voyvodası ve Amasya beytü’l-mâl emîni olup mâliye tahsîlâtında hayli hizmetleri görüldü. Ba’dehû Nasûh Paşa’ya intisâb edib sadâretinde sipâhîler ağası olarak temâyüz eyledi.
1023 ramazânında sadr-ı müşârün-ileyhin i’dâmında ma’zûl olup sonra Galata voyvodası, 1027’de kapıcılar kethüdâsı oldu. 1028’de tekâ’üde sevk edilip 1033’de vefât etdi. Cerbezeli, iş-güzâr, hâdim-i devlet idi.
Ammizâdesi ricâl-i devletten La’lî Alî Efendi bin Mustafa Ağa olup mahdûmu Kâsım Efendi dîvân-ı hümâyûn küttâbından idi. Diğer mahdûmu Mustafa Ağa olup bunun mahdûmu [388] Hüseyin Paşa ile Hasan Ağa’dır.