Amasyalı Ali’nin mahdûmudur. Tahsîl-i ulûm etdiği esnâda Şeyh Habîb-i Karamânî hazretlerine intisâb edib ikmâl-i tahsîl etdikte halîfesi olan Mevlânâ Seydî Alâeddîn Ali Çelebi hizmetinde tekmîl-i sülûk ederek halîfesi oldu.
940’da müşârün-ileyhin irtihâlinde Habîb-i Karamânî tekkesi şeyhi ve Mehmed Paşa Câmii vâ’izi oldu. 949’da esnâ-yı va’zında Amasya vâlîsi Şehzâde Sultân Mustafa’ya isrâfından dolayı nasîhat-âmîz ba’zı kelimât sarf etdiğine binâ’en tekke ve kürsî meşîhatinden azl edildiği gibi Müftü Sinan Efendi de azl u teftîş edildi.
Ba’dehû Çeribaşı Mahallesi üstünde kâ’in arâzî-i hâliyyede yârân u ehibbâsı tarafından kendisine yapılan zâviyeye nakl-i mekân edib halktan alâkayı kestiğinden dolayı “Şehre küstü” lakabıyla iştihâr etdi. Ehibbâ ve mürîdânı zâviyesi etrafında hâneler inşâ ederek orası bir mahalle şeklini aldı. Buraya “Şehreküstü Mahallesi” ve “Şehriküstü Zâviyesi” dendi. [434]
On yıl kadar zâviyesinde zikr ü tevhîd, ibâdet-i Rabb-i Mecîd ile iştigâl edib 959 senesi ramazânında dâr-ı kudse irtihâl etdi. Âlim, âmil, zâhid, kâmil, vâ’iz, müttakî, mazınneden bir zât-ı Halvetî idi. Hulefâsından İmâmzâde Abdülkerîm Efendi ile Bâlî Dede meşhûr idiler.