Amasyalıdır. Esbak Amasya müftüsü ve Sultâniyye müderrisi Şeyhîzâde müderris Abdî Çelebi evlâdından Ahmed Çelebi bin Abdulkerîm bin Alî Çelebi bin müderris Abdî Çelebi mahdûmudır.
Amasya ulemâsından tahsîl-i ulûm edib ders-i âm ve müderris oldu. Esnâ-yı tedrîsinde medâris-i mu’tâdeyi devr ederek Kameriyye-i Tokat müderrisliğinden terfî’an Tokat mollası oldu. Ba’dehû sancâkları devr ederek Kayseriyye mollası olup 1016’da ihtiyâr-ı tekâ’üd etdi.
Beş yıl kadar Amasya’da aynü’l-a’yân olup livânın [227] hüsn-i idâresinde bir âmil-i mü’essir olduğu hâlde 1021 senesi şevvâlinde vefât etdi. Âlim, fâzıl, müdebbir, kâmil, sâhib-i servet ü i’tibâr olan mevâlî-i devriyyedendir.
Terakkiyâtında ammizâdesi İsmâ’îl Efendi bin Mehmed Efendi bin Abdulkerîm Çelebi İstanbul’da i’mâl-i nüfûz etmişdi. Hacı İlyâs Mahallesi’nde mescid ve zâviyesi vardır. Emlâkini bu hayrâtına vakf edib mahdûmu Abdülkerîm Efendi vakfına mütevellî ve yerine kâ’im oldu. Hafîdi Mehmed, Mustafa Efendilerdir. Kudâttan Mustafa Efendi 1064’de vefât edib mahdûmu Mehmed Çelebi 1075’de bilâ-veled vefât etdi.
Kölesi ve kethüdâsı Memi Bey, Nasûh Paşa sadâretinde mîrlivâ olup oğulları İbrâhim, Mehmed Beylerdir. İbrâhim Beyzâde Çelebi İsmâ’îl Paşa vüzerâdandır. İbrâhim Bey’in diğer mahdûmu Abdurrahmân Ağa’dır. Memî Beyzâde Mehmed Bey mîrlivâ olmuştu.